البارحه يوم ان نصف الليل طرٌف وانتحا = قامت هواجيسي تجيب امن القرٌيب والبعيد
دنيا تدور اسنينها تدوراتها مثل الرحا = العام كنه ها السنه ماعاد به شيا ً جديد
تلحني دنياي لح السيل لا اعطا مع نحا = ما اقدر على صدماتها لو جت اعظامي من حديد
اما يجيني همها با الليل والا بالضحا = واصبح ملازمني ملازمت البلاده للبليد
ودي بقلب ً سالي ًلاجل اني اطرب وامرحا = وابحث عن الشيخة واعزم اهل السذاجه با القصيد
واقول انا جدي وجدي كان يصلخ يذبحا = واخذ سوالف غير جدي لاجل جدي يستفيد
يانعنبو بعض العلوم اللي تجي ما تصلحا = لاقامت الاقزام تبحث عن بروز بلا رصيد
العود يبقى مازينه مادام يستره اللحا = لكن ابه عيدان مافيها لحا مثل الجريد
والله ثم والله ما امدح واحد ً مايمدحا = لو هو عطاني مال ميكروسوفت واموال الوليد
ياللي تبون الشهره ابجيب جديد ومشلحا = تريحوا لا تتعبون ومركز الشهره بعيد
لكن شوفوا شهرة ً سهله مثل شهرة جحا = لعل منكم واحد ً من ها النصيحه يستفيد
امن اولا ً مافيه شي ً غالي ً مثل اللحا = تكفل ارقاب وتطلق ارقاب ً وتفعل ماتريد
واليوم راحت ماتساوي شي والقدر انمحا = ياليتها مازينة وجه المشفٌح والمريد
راحت وجيه ً كان يملاها الوقار امن السحا = وكثرت وجيه اللي سواد الوجه عنهم مايحيد
يفيدها اللي ميت ًحظه وقلبه ما صحا = فيده اليا فادواارجال الطيب جعله مايفيد
بعض المسائل واضحه مافيه داعي نشرحا = هذا الوكيد اللي يريده من يبا العلم الوكيد